Акцыя ў падтрымку прэзідэнта Віктара Януковіча пачалася з выступу прэм'ера Мікалая Азарава. На мерапрыемства, паводле ацэнак міліцыі, сабралася каля 60 тысяч чалавек.
Удзельнікаў мітынгу звезлі ў Кіеў з паўднёвых і ўсходніх рэгіёнаў Украіны. Гэта пераважна бюджэтнікі і работнікі прадпрыемстваў, якія належаць асобам, звязаным з Партыяй рэгіёнаў.
Мітынг працягнецца ў нядзелю, а потым, паводле задумы арганізатараў, акцыя стане бестэрміновай.
Для яго ўдзельнікаў у Марыінскім парку ўсталявалі намёты. Таксама на Еўрапейскай плошчы паставілі некалькі палявых кухняў.
Удзельнікі мітынгу настойваюць на тым, што яны — за пабудову Еўропы ва Украіне і за спыненне грамадзянскага супрацьстаяння.
Антымайдан, па задумах арганізатараў, мае стаць процівагай дэманстрантам, што ўжо трэці тыдзень патрабуюць еўраінтэграцыі Украіны і адстаўкі ўрада Януковіча.
