Пачала працаваць інтэрнэт-старонка крычаўскай незалежнай газеты «Вольны горад».
Зараз чытачы газеты маюць магчымасць азнаёміцца з размешчанымі ў ёй матэрыяламі, а таксама з навінамі з жыцця Крычава і ўсходніх раёнаў Магілёўшчыны, паведамляе сайт ГА «БАЖ».
Рэдактар газеты «Вольны горад» Сяргей Няроўны спадзяецца, што адкрыццё ўласнага сайта пашырыць кола прыхільнікаў і чытачоў газеты.
«Адкрыццё ўласнай інтэрнэт-старонкі дазволіць нам падвысіць аператыўнасць у падачы навінавых матэрыялаў.
Таксама мы спадзяёмся пашырыць мэтавую аўдыторыю «Вольнага горада» за кошт моладзі і не толькі. За кошт тых людзей, якія больш увагі надаюць электронным сродкам масавай інфармацыі», — кажа Сяргей Няроўны.
Незалежная газета «Вольны горад» выдаецца накладам 299 асобнікаў, яна распаўсюджваецца на тэрыторыі Крычаўскага і суседніх раёнаў усходняй Магілёўшчыны.
У гэтым годзе споўнілася пятнаццаць гадоў з дня выхаду першага нумару газеты «Вольны горад». За гэты час крычаўскімі журналістамі было выдадзена больш за 500 газетных нумароў.
Газета «Вольны горад» карыстаецца вялікай папулярнасцю сярод чытачоў.