РПЦ звольніла дыякана Кураева, які звярнуў увагу на гей-скандал у духоўнай семінарыі
Дыякана і самага вядомага праваслаўнага блогера вывелі з ліку выкладчыкаў Маскоўскай духоўнай акадэміі.
«Вучоная рада канстатавала, што протадыякан Андрэй Кураеў рэгулярна выступае ў сродках масавай інфармацыі і ў блогасферы з эпатажнымі публікацыямі і што яго дзейнасць у гэтых галінах застаецца ў шэрагу выпадкаў скандальнай і правакацыйнай», — паведаміла прэс-служба Маскоўскай духоўнай акадэміі — цэнтральнай навучальнай установы Рускай праваслаўнай царквы.
Дыякан Кураеў — самы вядомы праваслаўны блогер. Нядаўна ў сваім блогу ён надаў публічнасць скандалу ў Казанскай духоўнай семінарыі (Татарстан).
Стуль прыйшла скарга на сэксуальныя вычварэнствы кіраўніцтва з навучэнцамі. Пасля таго як факты пацвердзілі чатыры пятых студэнтаў і яны сталі вядомымі СМІ, звольнілі прарэктара па выхаваўчай працы.
Дыякан у сваім блогу патрабаваў, каб строга праверылі таксама рэктара акадэміі і мітрапаліта Казанскага, цесна з ім звязанага.
Але сам ён звязвае звальненне не столькі з асвятленнем казанскага скандалу, а з публікацыяй ліста, які расказвае аб гомасэксуалізме мітрапаліта Ленінградскага Мікадзіма Ротава — найбольшай фігуры расійскага праваслаўя ХХ стагоддзя.
Ротаў рукапаклаў цяперашняга патрыярха Кірылу. Ён быў папярэднікам мітрапаліта Мінскага і Слуцкага Філарэта на чале Аддзела замежных царкоўных зносінаў РПЦ — які ў савецкія часы выкарыстоўваўся КДБ для працы праз царкву. Ротаў памёр на аўдыенцыі ў Папы.
Кураеў называў гомасэксуалізм вялікай праблемай Рускай праваслаўнай царквы і заклікаў здаровыя сілы царквы аб'яднацца для ачышчэння.
Протадыякан Кураеў нярэдка вылучаў неардынарныя ідэі. Ён заклікаў да евангелізацыі Кітая. Ён звінаваціў іслам у параджэнні тэрарызму. Але па-над усім ён горача выступаў за абнаўленне праваслаўя, крытыкаваў яго заганы.
У канцы снежня Кураева выключылі з Сінадальнай багаслоўскай камісіі. Дарэчы, адначасова з ім выключылі архімандрыта, які сімпатызаваў Украіне. А 31 снежня Кураева адхілілі і ад выкладання ў Духоўнай акадэміі.
«Торжество голубого лобби?» — пад такім загалоўкам расказвае ў сваім блогу дыякан Кураеў пра тое, што адбылося.
Цяпер чытаюць
«Я першамайскае быдла і ліміта, базару нуль. Але блізкі да цэнтра прыняцця рашэнняў». Што Тур піша пад псеўданімам у «экстрэмісцкім» чаце25
Каментары