У Расіі пачалася адна з найвялікшых аперацыяў па падтрыманні бяспекі ў Алімпійскай гісторыі. Праз месяц у курортным горадзе Сочы на Чорным моры мае пачацца зімовая Алімпіяда.
Міністр па надзвычайных сітуацыях Уладзімір Пучкоў паведаміў, што ад аўторка ўсе аддзелы, адказныя за бяспеку гасцей Алімпіяды, прыведзеныя ў баявую гатоўнасць.
За парадкам на Алімпіядзе будуць сачыць больш за 30 тысяч паліцыянтаў і вайскоўцаў пры падтрымцы бранятэхнікі. У Сочы будзе забаронены ўезд транспарту, які не мае мясцовай рэгістрацыі альбо акрэдытацыі на Алімпіяду. Доступ да зонаў вакол алімпійскіх аб’ектаў будзе магчымы толькі па квітках і з пасведчаннем асобы.
Захады бяспекі былі ўзмоцненыя пасля таго, як у Валгаградзе пры канцы мінулага месяца адбыліся два выбухі, ад якіх загінулі 34 чалавекі. Следчыя падазраюць у арганізацыі выбухаў ісламісцкіх баевікоў з Паўночнага Каўказу.
