У суботу ў мінскай Ратушы адбыліся ўрачыстыя праводзіны мужчынскай зборнай Беларусі на чэмпіянат Еўропы па гандболе, што пачынаецца ў Даніі ўжо сёння матчамі Ісландыя — Нарвегія ды Чэхія — Аўстрыя.
Лідар зборнай Беларусі Сяргей Рутэнка, за ім — галоўны трэнер Юрый Шаўцоў, Goals.by
16 фактычна найлепшых камандаў свету (менавіта так, бо мужчынскія каманды Еўропы на галаву вышэйшыя за астатнія кантыненты) разбітыя на чатыры групы:
А: Чэхія, Аўстрыя, Данія (дзеючы чэмпіён Еўропы), Македонія.
В: Ісландыя, Нарвегія, Іспанія (дзеючы чэмпіён свету), Венгрыя.
С: Сербія, Польшча, Францыя, Расія.
D: Беларусь, Харватыя, Швецыя, Чарнагорыя.
Першы матч падапечныя Юрыя Шаўцова згуляюць у панядзелак з Харватыяй (пачатак у 20:00).
Харваты былі нашымі супернікамі год назад у 1/8 фіналу чэмпіянату свету ў Іспаніі, і беларусы прайгралі 24:33 (першы тайм наогул быў без шанцаў — 9:21).
У сераду беларусы згуляюць са Швецыяй (пачатак у 22:15), у пятніцу — ці не самы важны для нас матч у групе — з Чарнагорыяй (22:15), якая выбіла ў плэй-оф папярэдняга турніру зборную Германіі.
У наступны раўнд выходзяць па тры каманды. Каманды групы D далучацца да трох камандаў з групы С.
У выніку турнір будзе разбіты на дзве шасцёркі, і зборныя правядуць 19, 21 і 23 студзеня яшчэ тры гульні.
Затым — паўфіналы (чвэрцьфіналаў не будзе), а таксама матч за 5-е месца, фінал пройдзе 26 студзеня.
Каб трапіць на чэмпіянат свету, што пройдзе ў 2015 г. у Катары, трэба трапіць у лік трох найлепшых камандаў.
Учора, 11 студзеня, лідар зборнай Беларусі Сяргей Рутэнка адказаў на пытанні журналістаў:
— Ваша думка пра супернікаў? З чым прыйдзецца сутыкнуцца зборнай Беларусі ў Даніі?
— Калі коратка, то з хуткім, дынамічным гандболам. Усе тры каманды нашай групы яго вызнаюць. Спадзяюся, што з чарнагорскім варыянтам мы дамо рады. Хоць апошні чэмпіянат свету паказаў, што з гэтай зборнай будзе таксама вельмі цяжка.
— Хто ваш галоўны супернік на чэмпіянаце?
— Мяркую, што Чарнагорыя. Будзем старацца зачапіць шведаў. З харватамі, вядома, будзе цяжка, але таксама будзем змагацца.
— Кажуць, што ў паўднёвых народаў высокая самасвядомасць. Што гатовыя супрацьпаставіць?
— Дысцыпліну.
— Зборную Беларусі можна назваць камандай сярэдняга еўрапейскага ўзроўню?
— Так. Два топ-турніры, якія мы згулялі, дазваляюць так казаць. Але, шчыра кажучы, не хочацца хадзіць толькі ў серадняках.
Матчы зборнай Беларусі будзе паказваць у жывым эфіры тэлеканал «Беларусь-2». Такім чынам першы матч у панядзелак, 13 студзеня, у 20:00, матч супраць Харватыі.
