Навучэнцам лячэбнага факультэта Беларускага дзяржаўнага медычнага ўніверсітэта прапанавалі пабыць ў масоўцы на здымках фільма «Авель».
Грошай ім не абяцаюць, але залічаць адпрацоўку за пропуск любой пары ў семестры — допіс пра гэта з’явіўся ў адной з сацыяльных сетак.
«На 1—2 лютага трэба вельмі шмат людзей для ўдзелу ў здымках фільма, 20.00—24.00. Аплаты няма, будзе гарачы чай. За кожны дзень здымак адпрацоўка без адпрацоўкі на любы дзень у семестры!»
Час здымак прыпадае на вакацыі студэнтаў. 1 лютага ад 21.00 да 1.00 плануецца здымаць сцэны на Кастрычніцкай плошчы ды праспекце Незалежнасці, 2 лютага — Дом урада. Удзельнічаюць па сцэнары 4 000 чалавек.
Нагадаем, у фільме будуць прысутнічаць эпізоды, дзеянні якіх разгортваюцца на фоне масавай дэманстрацыі ў Мінску пасля прэзідэнцкіх выбараў 19 снежня 2010 года. Гэты факт у мінулым годзе даў падставу інтэрнэт-супольнасці назваць «Авель» своеасаблівым адказам на фільм «Жыве Беларусь» Кшыштафа Лукашэвіча па сцэнары апазіцыйнага актывіста Франака Вячоркі.
На плошчы Незалежнасці адновяць момант, калі ламалі дзверы ў Доме ўрада. Для гэтага перад сапраўднымі дзвярыма паставяць бутафорскія —
іх і будзе ламаць масоўка. Здымкі ў цэнтры Мінска будуць праходзіць ад 30 студзеня па 2 лютага.
Як стала вядома, 30—31 студзеня паўдзельнічаць у масоўцы запрашаюць студэнтаў БНТУ.
