У жыцці 19-гадовая Кацярына — студэнтка, біёлагвірусолаг, а таксама фотамадэль. А на Майдане — кухарка і прыбіральшчыца.
19-гадовая Кацярына працуе на кухні.
Мужчыны грэюцца ля бочкі з агнём.
Ялінка для Януковіча.
«Рэвалюцыйныя» сувеніры можна набыць адразу на выхадзе з Майдана.
Дзмітро (у цэнтры), ахоўнік Кіеўскай гарадской рады.
«Я раней ніколі не прыбірала. А тут навучылася мыць туалеты, чысціць цыбулю. Чаго тут саромецца?» — кажа дзяўчына.
За два месяцы рэвалюцыі Каця паспела няўдала закахацца ў абаронцу Майдана. «Разбіў мне сэрца», — прызнаецца красуня. Цяпер у яе новае каханне, таксама рэвалюцыянер. «Ну не з «цітушак» жа выбіраць!» — кажа Каця.
Некалькі мужчын грэюцца ля бочкі з агнём. Сярод іх бацька і сын, 58 і 24 гады, з паўднёваўкраінскага прамысловага горада Запарожжа.
Працуюць на адным заводзе. У бацькі заробак 2000 грывень. Гэта 2,2 мільёна беларускіх рублёў. Абураецца, калі чуе, што пратэстоўцам на Майдане нібыта плацяць грошы. «Мы заплацілі 380 грывень на дваіх за білеты, каб прыехаць сюды», — кажа мужчына.
Адзін з ахоўнікаў, 33-гадовы Сяргей, ладзіць мне невялікую экскурсію па ранішнім Майдане. «Вось гэта ялінка, якую мы вазілі да дома Янука [інсталяцыя з дроту з партрэтамі чыноўнікаў замест шарыкаў — «НН»]. А гэта інфацэнтр».
Сяргей прызнаецца, што ён не за тых і не за тых, а за тое, «каб было нармальна».
Метраў за дзесяць ад барыкадаў жанчынка прадае «рэвалюцыйныя» сувеніры.
Майкі — 60-70 грывень, сіня-жоўтыя стужкі — па 5 і 10, магніцік — 10 грывень. Вайна вайной, а есці трэба.
Суботні вечар на Майдане выдаўся спакойным. Прама пасярод вуліцы, паміж палаткамі, стаяць сталы для настольнага тэніса, грае моладзь. У цэнтры Майдана, ля фантана, мужчыны расклалі шахматы.
Хтосьці фатаграфуецца з «арыштаваным» Януковічам, хтосьці стаіць у чарзе за халяўнай ежай.
Раптам да Майдана па'язджае калона аўто, якія няспынна сігналяць. «Гэта аўтамайдан», - тлумачыць адзін з ахоўнікаў.
Заходжу пагрэцца ў гандлёвы цэнтр, які ўжо колькі часу працуе ва ўмовах «рэвалюцыі». Многія крамы адчыненыя, працуюць. Але прадавачкі скардзяцца, што ўпалі прадажы.
«Некаторыя з першай лініі ўвогуле вымушаны былі зачыніцца. Продажу няма, а арэнду плаціць трэба», —распавядае дзяўчына з крамы ўпрыгожванняў.
«Януковіч сам сабой, як і ўсе папярэднія прэзідэнты, не ёсць адной толькі прычынай», — кажа 47-гадовы Дзмітро з аўтэнтычным украінскім чубам і вусамі. На яго думку, прычына ўкраінскіх бедаў — сацыялістычная спадчына. Украіна часткова населена людзьмі, у якіх дагэтуль у галаве Савецкі Саюз, ці нават Расійская Імперыя.
«Пакуль цалкам не зменім сістэму, не атрымаем нармальнай еўрапейскай краіны. Нас цікавіць не Украіна ў Еўропе, а Еўропа ва Украіне», — тлумачыць мужчына.
У звычайным жыцці ён кінолаг, гандлюе заатаварамі. На Майдане — ахоўнік Кіеўскай гарадской рады. Пытаюся, ці атрымлівае за гэта грошы: «Гэта не той Майдан. Грошы плацяць у Януковіча».