На Еўрапейскім турніры Выкліку, што ў суботу завяршыліся ў польскім Гданьску, хакейная зборная Беларусі, якая не ўдзельнічае ў Алімпійскім турніры ў Сочы, прайграла два матчы з трох.
У чацвер падапечныя Глена Хэнлана перамаглі Венгрыю з лікам 2:1, а затым двойчы прайгралі — упершыню ў гісторыі зборнай Італіі (1:2), а ў суботу гучна саступілі Польшчы — 2:4. Зборная Польшчы — каманда трэцяга хакейнага эшалону, якая выступае ў групе B першага дывізіёна.
У сусветным рэйтынгу Міжнароднай федэрацыі хакея, зборная Беларусі на 14-м месцы, Італія — на 18-м, Венгрыя — на 19-м, а Польшча на 23-м. Праўда, беларусы выступалі на турніры ў Польшчы без шэрагу вядучых гульцоў — братоў Касціцыных, Мезіна, Калюжнага ды інш.
Таму галоўны трэнер Беларусі Глен Хэнлан заклікаў не панікаваць адносна перспектыў беларускай зборнай на ЧС у Мінску.
«Не скажу, што вынік прымушае мяне панікаваць адносна перспектыў зборнай на майскім чэмпіянаце свету ў Мінску. Зразумела ж, што на ім стаўка будзе рабіцца ў асноўным на іншых выканаўцаў. А многія з тых, хто былі ў Гданьску, запрошаны для перспектывы: іх час прыйдзе праз два-тры гады. Але вось адносна гэтай перспектывы сапраўды ёсць над чым задумацца і за што турбавацца — што будзе праз два-тры гады?».. — паскардзіўся Хэнлан.
На чэмпіянаце свету па хакеі, што пройдзе з 9 па 25 мая ў Мінску, наша зборная гуляе ў адной групе з камандамі ЗША, Расіі, Фінляндыі, Швейцарыі, Германіі, Латвіі, Казахстана.
Каб застацца ў эліце, трэба не заняць апошняга месца.
