Прэзідэнт Казахстана Нурсултан Назарбаеў запэўніў, што далейшага паніжэння курсу тэнге не будзе.
«Далейшага зніжэння курсу тэнге не будзе, хвалявацца не трэба. Дэвальвацыя забяспечыць рост эканомікі не менш, чым на 6 працэнтаў у 2014 годзе», — заявіў Назарбаеў на пашыраным пасяджэнні ўрада ў пятніцу, перадае агенцтва «Навіны-Казахстан».
Кіраўнік дзяржавы заклікаў насельніцтва не панікаваць і не скупляць прадукты харчавання ў вялікіх колькасцях.
«Не трэба мяхамі муку скупляць, асноўныя прадукты харчавання, што нам неабходныя, у нас ёсць у дастатку на некалькі гадоў. Не трэба хвалявацца», — сказаў ён.
Ураду прэзідэнт даручыў не дапусціць спекуляцый на рынку харчавання. «Трэба строга сачыць, каб цяпер спекуляцый не было ў гандлёвых кропках, каб не спрабавалі зарабіць на народзе», — адзначыў Назарбаеў.
