У Брэсце 17 лютага ў выніку ДТЗ загінуў чалавек, яшчэ адзін - цяжка паранены.
Як паведаміла БелаПАН старшы інспектар аддзялення па агітацыі і прапагандзе ДАІ УУС Брэсцкага аблвыканкама Наталля Касьянік, у 1.50 24-гадовы берасцеец за рулём «Опеля- Амегі « ехаў па аўтадарозе М1/Е30 ад вуліцы Дуброўскай у напрамку пункта пропуску «Казловічы». Недалёка ад пункта пропуску ён здзейсніў сутыкненне з вялікагрузным аўтамабілем « ДАФ « з паўпрычэпам, які рухаўся на малой хуткасці ў спадарожным кірунку.
Фура стаяла ў чарзе, каб перасекчы беларуска-польскую мяжу, і ў гэты час была ў ёй апошняй.
У выніку ДТЗ 48-гадовая пасажырка «Опеля», якая знаходзілася на пярэднім пасажырскім сядзенні, ад атрыманых цялесных пашкоджанняў памерла на месцы. Яна пражывала ў Брэсце.
Кіроўца з закрытай чэрапна-мазгавой траўмай цяжкай ступені і іншымі траўмамі шпіталізаваны ў рэанімацыйнае аддзяленне Брэсцкай абласной бальніцы.
33-гадовы кіроўца фуры, жыхар Бярозы, не пацярпеў.
Высвятляюцца прычыны і абставіны дарожна-транспартнага здарэння, у кіроўцы «Опеля» ўзятая кроў для даследавання на наяўнасць алкаголю.
«Опель-Амега « аднаўленню не падлягае.