Адной з крыніц фінансавання эканамічных рэформаў ва Украіне могуць стаць грошы з замежных рахункаў Віктара Януковіча і яго атачэння.
Пра гэта заявіў кіраўнік МЗС Польшчы Радаслаў Сікорскі ў эфіры Польскага радыё. Ён пацвердзіў, што Польшча лічыць Януковіча ўжо былым прэзідэнтам.
«Так, Польшча прызнае краіну, а не ўрады. Януковіч зрабіў нешта нечуванае», — сказаў Сікорскі.
Ён здзівіўся паводзінам Януковіча, які фактычна збег з Кіева адразу пасля падпісання антыкрызіснага пагаднення.
Каментуючы эканамічную сітуацыю ва Украіне, Сікорскі падкрэсліў неабходнасць барацьбы з карупцыяй і рэформаў у краіне.
На яго думку, адной з крыніц падтрымкі рэформаў ва Украіне павінны быць рэсурсы па замарожванні рахункаў і актываў Януковіча і яго атачэння за межамі Украіны.
«Гэта велізарная адказнасць некаторых краін Еўрапейскага Саюза, мы пераконваем на працягу многіх тыдняў, каб зрабіць нешта з гэтымі грашыма, якія, мы ўсе ведаем, захоўваюцца на заходніх рахунках», — заявіў кіраўнік Польскага МЗС.
