3 сакавіка ля будынка Адэскай абласной адміністрацыі быў арганізаваны мітынг праціўнікаў украінскай улады. Група мітынгоўцаў прарвалася ўнутр.
У зале, дзе праходзіць пасяджэнне абласной рады, адбылася бойка. У ёй узяў удзел, у прыватнасці, актывіст рускага нацыяналістычнага руху Валерый Каўраў, які спрабаваў выступаць з трыбуны насуперак жаданню дэпутатаў.
Лідар прарасійскай арганізацыі «Маладзёжнае адзінства» Антон Давыдчанка абвясціў патрабаванні да дэпутатаў.
Ім было прапанавана часова ўзяць на сябе ўсю паўнату ўлады ў рэгіёне, прыняць у сваё падпарадкаванне сілавыя структуры рэгіянальнага ўзроўню — упраўленне ўнутраных спраў, пракуратуру, упраўленне Службы бяспекі Украіны. «Мы не за раскол Украіны. Але мы патрабуем тэрытарыяльнай адміністрацыйнай рэформы», — адзначалася ў заяве мітынгоўцаў.
Удзельнікі мітынгу таксама заклікалі правесці рэферэндум аб асаблівым статусе Адэскай вобласці.
На абмеркаванне аблрады на гэтым фоне быў вынесены адпаведны праект на рэферэндум: прапаноўвалася вынесці пытанне аб стварэнні Адэскай Аўтаномнай Рэспублікі ў складзе Украіны.
Аднак большасці галасоў ён не набраў.
