Сёння ў Вярхоўную раду Украіны будзе ўнесены Закон аб Нацыянальнай гвардыі Украіны. Пра гэта паведаміў у сваім Фэйсбуку міністр унутраных спраў краіны Арсен Авакаў. «У бліжэйшы час аб'явім мабілізацыю ў Нацгвардию. Дваццаць тысяч гвардзейцаў будуць пакліканы для аховы межаў Украіны і грамадзянскага парадку ў краіне. Гэта — як адказ на дэстабілізацыю звонку. І гэта не ваенны адказ — гэта будзе арганізаваны адказ грамадзянскай супольнасці. Хто не ведае, адзначу што ў ваенкаматах краіны ініцыятыўна запыталі мабілізацыю некалькі дзясяткаў тысяч чалавек. І гэта па-за сістэмай арганізаванай мэтанакіраванай мабілізацыі ў Украіне», — напісаў міністр.
26-28 лютага расійскія войскі занялі Крым і стварылі там марыянеткавы ўрад на чале з кіраўніком партыі «Рускае адзінства», якая на апошніх выбарах у крымскі парламент сабрала 4% галасоў, а ў Вярхоўную Раду — усяго 1,2%.
Аналагічны сцэнар запушчаны і ва Усходняй Украіне. У Харкаве, Данецку і Луганску праводзяцца мітынгі за далучэнне рэгіёна да Расіі.
Расійскія СМІ сцвярджаюць, што ў мітынгах за далучэнне да Расіі ўдзельнічае мясцовае рускамоўнае насельніцтва. Украінскія СМІ гавораць пра ўдзел вялікіх групаў штурмавікоў з Расіі.
Баксёр Віталь Клічко, знаходзячыся ў Данецку, заявіў, што «сёння рэферэндумаў ва ўсходніх абласцях Украіны патрабуюць грамадзяне іншай краіны».
Украінскія сілавыя структуры пераважна пасіўна рэагавалі на ўварванне расійскіх войскаў у Крым. Хоць вайскоўцы Мінабароны ў масе сваёй і адмовіліся здрадзіць прысязе, яны не аказалі актыўнага супраціўлення захопнікам.
