На сённяшні дзень у Мінскай вобласці адзначаецца значны рост забойстваў і фактаў наўмыснага прычынення цяжкіх цялесных пашкоджанняў. Найбольш часта такія злачынствы ўчыняюцца ў сельскай мясцовасці і буйных гарадах, паведаміў старшы памочнік пракурора вобласці Уладзімір Непакупны.
Паводле яго слоў, учыненню 75% такіх злачынстваў папярэднічае ўжыванне спіртных напояў. Раней судзімымі асобамі ўчыняецца кожнае 3-е забойства і кожнае 4-е цяжкае цялеснае пашкоджанне. З агульнага ліку асоб, якія ўчынілі забойствы і нанеслі цяжкія цялесныя пашкоджанні, 55% нідзе не працавалі і не вучыліся.
Найбольш тыповы для Мінскай вобласці сацыяльны партрэт забойцы — гэта мужчына ва ўзросце ад 25 да 50 гадоў, нідзе не працуе, злоўжывае спіртнымі напоямі, з'яўляецца знаёмым або сваяком ахвяры.
Больш як у палове выпадкаў мела месца сумеснае спажыванне спіртных напояў пацярпелым са злачынцам незадоўга да ўчынення злачынства на глебе непрыязных адносін па намеры, які ўзнік раптам і неадкладна быў рэалізаваны.
Кожнае чацвёртае забойства і цяжкае цялеснае пашкоджанне ўчыняюць жанчыны.
Асноўныя прычыны ўчынення забойстваў і прычынення цяжкіх цялесных пашкоджанняў, паводле слоў прадстаўніка пракуратуры, — гэта ўстойлівыя асацыяльныя паводзіны, злоўжыванне алкаголем, нежаданне асобных катэгорый грамадзян займацца грамадска-карыснай працай, змена не ў лепшы бок маральных арыенціраў.
«Такое становішча <…> не з'яўляецца часовым. Спадзявацца на тое, што праз некаторы час злачынствы гэтага віду спыняцца самі па сабе, па меншай меры неразумна і безадказна», — канстатаваў старшы памочнік пракурора вобласці.
Неабходна на сталай аснове праводзіць працу па своечасовым выяўленні беспрацоўных асоб, якія злоўжываюць спіртнымі напоямі, для правядзення ў дачыненні да іх індывідуальных прафілактычных мерапрыемстваў, прадугледжаных заканадаўствам.
Далёка не апошнюю ролю ў барацьбе са злачыннасцю, адзначыў Напакупны, «адыгрывае і нецярпімасць грамадства да п'янства, наркаманіі і ўтрыманства».