9 мая мае стаць апагеем актывізацыі прарасійскіх актывістаў у Украіне. Менавіта тады Масква хоча завершыць другі этап аперацыі па расчляненні Украіны. Расіі трэба паспець да прэзідэнцкіх выбараў 25 мая, якія дадуць суседняй дзяржаве ўсенародна абранага прэзідэнта з моцным мандатам. Такі прагноз на сваёй старонцы ў Facebook зрабіў кіраўнік украінскага Цэнтра ваенна-палітычных даследаванняў Дзмітрый Тымчук.
«Пачынаецца новая хваля актывізацыі сепаратысцкіх рухаў. Агульная мэта — апафеоз сепаратысцкага шабашу да 9 мая. Але гэта па іх сцэнары. Цяперашняя праца ўкраінскіх праваахоўнікаў і спецслужбаў ставіць пад вялікі сумнеў рэалізацыю гэтых планаў», — адзначыў ён.
Тымчук паведаміў, што Галоўнае выведвальнае кіраўніцтва РФ адклікае сваіх супрацоўнікаў з Крыма, перакідвае іх на ўсход Украіны.
«Каардынацыйным цэнтрам сепаратыстаў у Расіі прынята рашэнне ўзмацніць сетку каардынатараў ГРУ Генштаба Расіі, якія дзейнічаюць на ўкраінскай тэрыторыі. З гэтай мэтай з Крыма адкліканы супрацоўнікі расійскага ГРУ, пры непасрэдным удзеле якіх быў рэалізаваны сцэнар абвяшчэння «незалежнасці» і адлучэння Крыма ад Украіны», — напісаў Тымчук.
Нагадаем, 8 красавіка Тымчук адзначаў, што сепаратысты ў паўднёва-ўсходніх абласцях Украіны атрымалі заданне «арганізоўваць правакацыі з ахвярамі» ў гарадах рэгіёна, каб Расея магла гэта інтэрпрэтаваць як « тэрор украінскай улады супраць народу» і ўвесці свае войскі на ўкраінскую тэрыторыю.
Каментары