Беларускія турыстычныя кампаніі разглядаюць магчымасць арганізацыі ахоўнага суправаджэння аўтобусаў падчас паездак на тэрыторыі Украіны.
Як паведаміла на прэс-канферэнцыі ў Мінску 11 красавіка генеральны дырэктар туркампаніі Solvex Аксана Бічун, беларускія турысты адмаўляюцца ад аўтобусных тураў у Балгарыю, калі маршрут праходзіць па тэрыторыі Украіны, а не Польшчы.
Асаблівую трывогу дырэктар турфірмы выказала наконт развіцця сітуацыі ва Украіне пасля прэзідэнцкіх выбараў, прызначаных на 25 мая.
«Сезон пачынаецца ў чэрвені, таму ўсе нашы дзеянні, якія будуць звязаны з развіццём бяспекі ў краіне, могуць быць развеяны ўшчэнт. Мы сёння не ўпэўнены ў тым, што будзе ў краіне пасля выбараў», — адзначыла яна.
На думку Бічун, калі Украіна не ажыццявіць ніякіх дзеянняў, то можа страціць беларускі рынак.
«Мы гатовы сёння заплаціць за міліцэйскае суправаджэнне, каб на мяжы нашы аўтобусы сустракалі і суправаджалі. Вы можаце гарантаваць нам бяспеку такім чынам», — прапанавала яна прадстаўнікам украінскага пасольства ў Беларусі.
«Мы выбудавалі свае графікі, але мы не ведаем, што будзе пасля выбараў. Мы занепакоены і сёння дадаткова акрэдытуемся ў еўрапейскіх пасольствах, атрымліваем дадатковыя транзітныя візы, таму што рыхтуемся да самага горшага — што мы праз Украіну не паедзем», — адзначыла Бічун.
Як расказала дырэктар турыстычнай фірмы «Каў-Тур» Ала Клокава, прадстаўнікі адной з гасцініц Чарнаўцоў выказалі гатоўнасць забяспечыць платныя паслугі па ахоўным суправаджэнні беларускіх турыстычных аўтобусаў, калі яны будуць ехаць цэнтралізаванай калонай.
Акрамя таго, паводле слоў прадстаўніка ўкраінскага санаторна-курортнага комплексу «Трускавец» Алега Рэгі, ва Украіне працуе дзяржаўная служба аховы, якая легальна прадастаўляе паслугі па ўзброенай ахове транспарту.