Кадравыя рашэнні ў дачыненні да кіраўніцтва МУС і СБУ Данецкай вобласці павінны ўмацаваць сілавыя структуры рэгіёну, а сепаратыстам даецца ці не апошні шанец добраахвотна скласці зброю.
Такую заяву зрабіў намеснік кіраўніка Адміністрацыі прэзідэнта Украіны Андрэй Сенчанка.
Падзеі на Данеччыне чыноўнік лічыць вынікам прарасейскіх правакацый, на якія паддаліся і простыя жыхары краю.
За бяздзейнасць у Адміністрацыі прэзідэнта абяцаюць пакараць і праваахоўнікаў, якія падчас захопу аддзяленняў міліцыі і адміністрацыйных устаноў на Данеччыне не аказвалі сепаратыстам ніякага супраціву.
Асобна Сенчанка звярнуўся да экстрэмістаў.
«Тыя, хто ўзяў зброю ў рукі, хто займаў аддзяленне міліцыі, у тым ліку для таго, каб атрымаць доступ да зброі. Гэта людзі, якія здзейснілі злачынства. Калі вы не складзеце зброю і не вызваліце будынак, то ўлада вымушаная будзе прыняць рашэнне аб цвёрдым сілавым сцэнары. Сіл для гэтага на ўсходзе краіны сёння ў нас дастаткова», — заявіў Сенчанка.
