У гістарычным цэнтры старадаўняга мястэчка Моўчадзь у Баранавіцкім раёне каларытны габрэйскі дом-аптэку перарабілі ў сучасную прадуктовую краму.
Так выглядае стары габрэйскі дом-аптэка пасля сучаснага рамонту.
А так дом-аптэка выглядаў яшчэ год таму.
Так выглядаў цэнтр Моўчадзі пяць гадоў таму.
Так выглядаў цэнтр Моўчадзі пяць гадоў таму.
Цэнтральны пляц Моўчадзі з яшчэ не пераробленым будынкам старой аптэкі, сакавік 2013 года.
Па словах мясцовых жыхароў, гэтаму дому больш за сто гадоў. Ён стаіць у гістарычным цэнтры былога габрэйскага мястэчка Моўчадзь, што па дарозе з Баранавіч на Дзятлава і далей на Захад.
Гістарычная забудова цэнтральнага пляца Моўчадзі – тыповыя габрэйскія дамы-крамы з уваходам пасярэдзіне, узорам якіх з’яўляецца і згаданы будынак. Традыцыйна ў адной палове такога дома, напрыклад на першым паверсе альбо ў пярэдняй частцы, габрэйская сям’я адкрывала краму, а ў другой палове жыла сама.
Але менавіта гэты дом вылучаўся сярод іншых тым, што пабудаваны з цэглы, а не з дрэва, меў нетыповы мураваны ганак з металічнымі парэнчамі, а таксама металічныя аканіцы. У савецкі і ранні постсавецкі час у гэтым доме функцыянавала аптэка. Аднак апошнімі гадамі будынак не выкарыстоўваўся.
Зусім нядаўна ў ім «прапісалася» адно з прыватных гандлёвых прадпрыемстваў, перарабіўшы стары дом пад новую краму. На жаль, пасля сучаснага рамонту старадаўні будынак страціў шмат сваіх адметных рысаў.