У Славянску сепаратысты захапілі актывістку Еўрамайдану, «жаночай сотні Майдану» Ірму Крат.
Пра гэта «Украінскай праўдзе» паведамілі інфармаваныя крыніцы — відавочцы падзей.
Па дадзеных крыніц, сепаратысты абвінавачваюць Крат у «катаваннях антымайданаўцаў і расстрэле «Беркута».
Журналістаў прывялі да Ірмы Крат, у якой быў кулёк на галаве, і, паказаўшы на яе, заявілі, што ў яе была «жаночая сотня» на Майдане, а ў Славянск яна прыехала, «каб шкодзіць».
Пасля гэтага Крат забралі ў невядомым кірунку.
Як паведаміла Крат у каментары расейскаму тэлеканалу LifeNews, яна прыехала ў Славянск як журналіст, «асвятляць падзеі».
«Мяне затрымалі за тое, што я нібыта выступіла супраць рэферэндуму. Але гэта здагадкі. Я прыехала ў Славянск, каб распавесці аб'ектыўную карціну», - адзначыла яна.
Разам з тым журналіст Сямён Шустэр, які знаходзіцца ў Славянску, размясціў у сваім Twitter'ы кароткі відэаролік з Ірмай Крат (журналістам не далі магчымасці з ёй пагутарыць).
«Гэта ўсё, што ў мяне ёсць… Дапамажыце звязацца з яе сям'ёй, сябрамі», - адзначыў ён.
У апісанні да відэа гаворыцца: «Ірма Крат, украінскі актывіст з Кіева, затрыманая для допыту сепаратыстамі на ўсходзе Украіны. Па стане на 20 красавіка знаходзіцца ў штаб-кватэры Службы бяспекі Украіны ў Славянску. Камандзір сепаратыстаў заявіў, што яна падазраецца ў злачынствах, у т. л. катаваннях. Яе выкрадальнікі не дазвалялі ёй гаварыць з прэсай».
Перад гэтым ён паведаміў, што сілавікі-сепаратысты «паказалі нам «агента з Майдана», якога яны злавілі — маладая жанчына ў светлым паліто».