Як паведамляе сайт Марыупаля (Данецкая вобласць) 0629.com.ua, паміж 3-й і 4-й раніцы будынак быў вызвалены ад расійскіх штурмавікоў.
«5 пацярпелых з боку захопнікаў мэрыі з рознымі траўмамі павезлі ў гарадскія бальніцы», — дадае 0629.
Аперацыю ажыыцявілі Унутраныя войскі Украіны.
«Марыупаль. Мэрыя вызваленая для нармальнай працы. Значная роля грамадзкіх актывістаў», — паведаміў міністр унутраных спраў Арсен Авакаў на сваёй старонцы ў Facebook.
Паводле яго слоў, зараз будынак правяраюць выбухатэхнікі. Гарсавет бярэцца пад ахову.
Прарасійскія штурмавікі ўтрымлівалі гарсавет з 13 красавіка.
«Гарсавет забралі. Прымалі жорстка, ёсць параненыя. Па перыметры выстаўлена ачапленне. У ГУУС бачылі людзей у міліцэйскай форме нават з кулямётам», — заявілі прадстаўнікі штурмавікоў.
Паводле звестак, які апублікавалі асобныя сепаратысты ў сацыяльных сетках, яны страцілі будынак гарсавета па схеме Адэсы і Днепрапятроўска.
У іх шэрагі былі ўведзеныя людзі, якія абвясцілі сябе лідарамі, у іх асяроддзя пачаўся разброд, а потым здалі пазіцыі.
Уранку ў мэрыю пачалі пускаць супрацоўнікаў гарсавета і наведнікаў.
Па стане на 09:30 у будынку Марыупальскага гарсавета праходзяць перамовы паміж прадстаўнікамі ўладаў, праваахоўных органаў і прадстаўнікамі «Данецкай народнай рэспублікі». Апошнім прапануюць два кабінеты на другім паверсе.
