Ніякага «Рускага маршу» клуб заўзятараў Russia Unites арганізоўваць не плануе, заявіў прэзідэнт клуба Эдуард Латыпаў.
У каментары, размешчаным 30 красавіка на сайце Russia Unites, адзначаецца, што ў шэрагу беларускіх і расійскіх СМІ з'явілася інфармацыя аб тым, што 9 мая ў Мінску нібыта адбудзецца нейкі «Рускі марш» з удзелам расійскіх хакейных фанатаў. У сваіх матэрыялах СМІ спасылаліся на прэзідэнта Russia Unites Латыпава.
Сапраўды, адзначаецца ў каментары клуба, у панядзелак, 28 красавіка, у Санкт-Пецярбургу адбылася прэс-канферэнцыя, прысвечаная старту чэмпіянату свету па хакеі і адкрыцці Дома балельшчыкаў зборнай Расіі Russia Unites у Мінску на час правядзення чэмпіянату свету. У прыватнасці, пра запланаваныя акцыі балельшчыкаў паведаміла Балтыйскае інфармацыйнае агенцтва: «Адкрыццё чэмпіянату свету сёлета выпадае на 9 мая. Традыцыйна мы арганізуем мерапрыемствы, прысвечаныя Дню Перамогі. Якраз 9 мая плануем арганізаваць калону расійскіх балельшчыкаў і паўдзельнічаць у мерапрыемствах у Мінску, — паведаміў Латыпаў. — Цяпер вядзём перамовы па гэтым пытанні з пасольствам РФ у Беларусі і з Мінгарвыканкамам, які займаецца арганізацыяй чэмпіянату свету».
У сваім каментары ад 30 красавіка Эдуард Латыпаў адзначае: «Вельмі шкада, што некаторыя СМІ, пагнаўшыся за гучнымі загалоўкамі, паведамілі пра нейкі «Рускі марш» у Мінску, у выніку чаго многія ўявілі сабе жахлівую карціну, як натоўп рускіх нацыяналістаў ідзе па сталіцы Беларусі, махаючы імперыялістычнымі сцягамі і выкрыкваючы «Слава Расіі».
«Адказна заяўляю: ніякага «Рускага маршу» клуб балельшчыкаў Russia Unites арганізоўваць не плануе. Але ў нас сапраўды есць дамоўленасць з уладамі Мінска аб тым, што расійскія балельшчыкі возьмуць удзел у мерапрыемствах, прысвечаных Дню Перамогі.
9 мая — свята, якое аднолькава дарагое жыхарам Расіі, Беларусі і ўсіх краін, якія былі ўцягнутыя ў жахлівыя падзеі сярэдзіны мінулага стагоддзя. І мы ні ў якім разе не збіраемся перабольшваць ці прымяншаць заслугі кожнага народа ў гэтай агульнай Перамозе», — падкрэслівае кіраўнік клуба балельшчыкаў зборнай Расіі.
«Для ўсіх грамадзянаў Расіі святы абавязак — 9 мая аддаць даніну памяці і павагі подзвігу савецкіх салдат. І лагічна, што, апынуўшыся ў іншай краіне, расійскія балельшчыкі таксама захочуць ускласці вянкі да помнікаў героям. Тым больш што ў Беларусі, як і ў Расіі, Дзень Перамогі — дзяржаўнае свята. Наша ідэя — сабраць расійскіх балельшчыкаў разам, каб цэнтралізавана ўзяць удзел у тых мерапрыемствах, якія запланаваныя беларускімі ўладамі», — тлумачыць Латыпаў.
Ён таксама звяртае ўвагу, што год таму падчас чэмпіянату свету па хакеі ў Хельсінкі клуб балельшчыкаў Russia Unites сумесна з пасольствам Расіі ў Фінляндыі таксама браў удзел ва ўскладанні вянкоў да мемарыяла ў гонар загінулых савецкіх ваеннапалонных.
Больш за тое, працягвае Латыпаў, «у Мінск з Расіі збіраецца выключна інтэлігентная публіка. Многія едуць сем'ямі».
Russia Unites — праект грамадскі, створаны для балельшчыкаў самімі балельшчыкамі, падкрэслівае яго кіраўнік. «Мы не трымаемся ніякіх палітычных, нацыяналістычных і іншых дыскрымінуючых ідэй, а таксама незалежныя ад якіх-небудзь дзяржаўных структур», — адзначаецца ў каментары.
Кіраўнік Russia Unites спадзяецца, што «не толькі 9 мая, але і ўсе наступныя дні чэмпіянату свету па хакеі пройдуць без эксцэсаў і распальвання нацыянальнай непрыязі, тым больш з улікам і без таго няпростага палітычнага становішча ў свеце».
