Запраўка сеткі «Славнефть», на якой раздаюць стужкі.
Атрыманыя стужкі.
Яшчэ адно месца, дзе да Дня Перамогі можна атрымаць чорна-аранжавую георгіеўскую стужку — запраўкі «Славнефть», якія належаць кампаніі «РН-Запад». Сёння акцыі «РН-Запад» належаць расійскай дзяржаўнай кампаніі «Роснефть».
Пра тое, што на запраўках «Славнефть» раздаюць георгіеўскія стужкі, у панядзелак паведаміў чытач «НН».
Маркетолаг кампаніі Аксана Шапілевіч у панядзелак паведаміла журналісту «НН», што кампанія далучылася да акцыі «Георгіеўская стужка» з уласнай ініцыятывы
«Гэта сімвал таго, што мы ганарымся подзвігам тых, дзякуючы каму жывем у мірнай краіне. Мы не выдаем стужкі ў абмен на пакупкі, гэта падарунак, які можа бясплатна атрымаць кожны чалавек на нашай запраўцы. Стужкі — не для стымуляцыі чагосьці, гэта — народная традыцыя».
Аднак тады ж Шапілевіч заўважыла, што «стужкі ўжо раздадзеныя».
Як высветлілася, стужкі «РН-Запад» раздала не ўсе. Журналіст «НН» атрымаў георгіеўскую стужку на мінскай запраўцы «Славнефть» па адрасе завулак Казлова, 9.
Пры гэтым стужкі не ляжаць навідавоку і іх адкрыта не прапануюць. Аднак папрасіўшы ў аператара запраўкі георгіеўскую стужку, журналіст «НН» атрымаў адразу восем штук.
