У Магілёве на швейнай фабрыцы ААТ «Магатэкс» устаноўлена новае абсталяванне французскай фірмы Lectra SA для падрыхтоўча-раскройнай вытворчасці.
Як паведаміў дырэктар швейнай фабрыкі ААТ «Магатэкс» Аляксандр Шамрай, на працягу апошніх трох гадоў тэхнічнае пераўзбраенне прадпрыемства дазволіла павялічыць прадукцыйнасць швейнага цэха ў сярэднім на 20%. «Аднак паўстала праблема дысбалансу паміж працай падрыхтоўча-раскройнага цэху і швейных участкаў. Пацвярджэннем гэтаму стала выкарыстанне звышвызначанага часу для вытворчасці патрэбнага аб'ёму раскрою паўфабрыкатаў. Гэту праблему і вырашыць новае абсталяванне, якое дазволіць скараціць час раскрою на 50%, палепшыць якасць прадукцыі і дасць магчымасць гнутка пераналадзіць вытворчасць пад кожную індывідуальную замову», — сказаў ён.
Да нядаўняга часу на «Магатэксе» прымяняўся механізаваны метад раскрою, паведамілі на прадпрыемстве. Ён прадугледжваў раскрой тканіны пры дапамозе электрычных рэжучых машын, якія перамяшчаюцца ўручную, што патрабавала вялікіх фізічных і часавых выдаткаў, наяўнасці значнай колькасці персаналу з высокім узроўнем кваліфікацыі. Аўтаматычны спосаб адрозніваецца тым, што раскрой праводзіцца перасоўнай аўтаматычнай рэжучай галоўкай, якой кіруе мікрапрацэсар ці камп'ютар.
Закупленае ў фірмы Lectra SA аўтаматызаванае насцілачнае абсталяванне мае комплекс прылад і прыстасаванняў, якія даюць высокую дакладнасць і якасць насцілання, што забяспечвае зніжэнне выдатку матэрыялу і павелічэнне хуткасці вытворчасці, сцвярджаюць на «Магатэксе». Працай усёй сістэмы кіруе камп'ютар, роля абслугоўваючага персаналу зводзіцца да загрузкі стойкі рулона тканіны.
На прадпрыемстве ўпэўненыя, што тэхнічнае пераўзбраенне падрыхтоўча-раскройнага цэха дазволіць эканоміць працоўныя рэсурсы, сыравіну і матэрыялы, вызваліць супрацоўнікаў ад цяжкай і манатоннай працы, дазволіць пашырыць асартымент прадукцыі.
Цяпер «Магатэкс», рэалізуючы стратэгію тэхнічнага пераўзбраення, вядзе перамовы з кампаніяй Samsung аб вырабе кампрэсара для падачы сціснутага паветра для тэхналагічнага абсталявання аддзелачнай фабрыкі.
