У красавіку гэтага года ў Беларусі было зарэгістравана 1.814 пацярпелых ад укусаў іксодавых кляшчоў, у тым ліку 726 дзяцей, што ў пяць разоў перавышае паказчыкі красавіка мінулага года.
Як паведамляе Рэспубліканскі цэнтр гігіены, эпідэміялогіі і грамадскага здароўя, рэзкаму росту колькасці пацярпелых садзейнічала павелічэнне ў 2,2 разу колькасці кляшчоў у прыродных біятопах у параўнанні з папярэднім годам.
Паводле слоў спецыялістаў, сезон актыўнасці кляшчоў сёлета пачаўся незвычайна рана, першыя ўкусы зарэгістраваны ў трэцяй дэкадзе лютага.
«Паступовае аднаўленне цёплага надвор'я пасля часовага пахаладання будзе садзейнічаць павышэнню ў маі актыўнасці і колькасці кляшчоў. Сезонны пік іх колькасці прагназуецца да канца мая — пачатку чэрвеня», — адзначаюць медыкі.
Спецыялісты папярэджваюць, што ў перыяд актыўнасці іксодавых кляшчоў з вясны да позняй восені існуе небяспека заражэння такімі інфекцыямі, як клешчавы энцэфаліт і хвароба Лайма.
Каб пазбегнуць заражэння, медыкі рэкамендуюць
максімальна закрываць адкрытыя ўчасткі цела пры наведванні лесапаркавых зон, прымяняць рэпеленты і акарыцыдныя сродкі, кожныя адну-дзве гадзіны праводзіць сама- і ўзаемаагляды адзення і скурных покрываў, а таксама ўжываць у ежу толькі гатаванае казінае малако.
У выпадку прысмоктвання кляшча рэкамендуецца выдаліць яго, апрацаваць ранку ёдам і звярнуцца да ўчастковага тэрапеўта або педыятра па прафілактычнае лячэнне.
