Валютная выручка Беларусі ў студзені—красавіку 2014 года скарацілася на 1 млрд. 9,8 млн. долараў ЗША ў параўнанні з аналагічным леташнім перыядам.
Згодна са звесткамі Нацыянальнага банка, па выніках чатырох месяцаў года гэты паказчык склаў 13 млрд. 776,5 млн. долараў, у тым ліку за красавік — 3 млрд. 532,7 млн. У параўнанні з красавіком 2013 года валютная выручка Беларусі зменшылася амаль на 300 млн. долараў, або на 7,7%.
Асноўнай прычынай скарачэння валютнай выручкі стала зніжэнне паступленняў ад экспарту тавараў. Так, у студзені—красавіку гэтага года валютныя паступленні Беларусі ад экспарту тавараў склалі 11,2 млрд. долараў і знізіліся на 1 млрд. 59,1 млн. долараў у параўнанні з аналагічным леташнім перыядам.
Як зазначаюць эканамісты, зніжэнне валютных паступленняў вядзе да скарачэння прапановы замежнай валюты на ўнутраным рынку, што, у сваю чаргу, аказвае дадатковы ціск на курс беларускага рубля.
