Аляксандр Лукашэнка 2 чэрвеня прыняў з дакладам старшыні Дзяржаўнага пагранічнага камітэта Леаніда Мальцава.
На сустрэчы таксама прысутнічаў дзяржаўны сакратар Рады бяспекі Беларусі Аляксандр Мяжуеў.
Аляксандр Лукашэнка пацікавіўся, ці маюцца якія-небудзь праблемы ў дзейнасці пагранведамства, якія патрабуюць прыняцця рашэння на ўзроўні прэзідэнта.
Кіраўнік дзяржавы адзначыў, што гэтым летам хацеў бы пабываць на мяжы, каб асабіста азнаёміцца з выкананнем раней дадзеных даручэнняў.
Лукашэнка заявіў, што ў прыватнасці мае намер азнаёміцца з развіццём турыстычнага патэнцыялу беларускіх выспаў на рацэ Заходні Буг. «Гэта вельмі цікава для людзей. З пункту гледжання патрыятычнага, ваенна -патрыятычнага выхавання для нас гэта вельмі важна», — сказаў кіраўнік дзяржавы. Пры гэтым ён адзначыў, што тры гады таму старшыня Брэсцкага аблвыканкама Канстанцін Сумар абяцаў прывесці ў парадак адпаведныя тэрыторыі і катакомбы, руіны, арганізаваць турыстычныя сцежкі.
На думку Аляксандра Лукашэнкі, тыя месцы таксама можна было б задзейнічаць для кіназдымак.
«Там з задавальненнем будуць здымаць фільмы, бо лепшага месца для натуральных здымак не знойдзеш», - адзначыў ён.