Наглядальны савет Банка развіцця Беларусі ўзгадніў аказанне спонсарскай дапамогі на закупку 72 аўтобусаў па сацыяльнай праграме «Школьны аўтобус», паведамілі ў прэс-цэнтры банка.
Будзе закуплена па 12 аўтобусаў на кожную вобласць, агульная сума спонсарскай дапамогі складзе амаль 45 млрд рублёў.
«Упершыню ў гэтым годзе будуць набытыя тры аўтобусы для перавозкі дзяцей з асаблівасцямі псіхафізічнага развіцця. Гэтыя аўтобусы будуць перададзеныя для эксплуатацыі ў цэнтры карэкцыйна-развіваючага навучання і рэабілітацыі Віцебскай, Гомельскай і Магілёўскай абласцей», — адзначылі ў прэс-цэнтры.
Праграма «Школьны аўтобус», якая рэалізуецца Банкам развіцця па даручэнні Лукашэнкі, прадугледжвае набыццё на працягу 2013-2017 гадоў за кошт сродкаў банка не менш як 300 адзінак спецыяльна абсталяваных школьных аўтобусаў. У 2013 годзе Банк развіцця закупіў 60 аўтобусаў і перадаў па 10 адзінак у кожную вобласць, накіраваўшы на гэтыя мэты амаль 39 млрд рублёў.
