Увядзенне інстытута спецімпарцёраў не плануецца, паведамляе прэс-служба Міністэрства прамысловасці Беларусі.
«Міністэрства прамысловасці пасля разгляду з зацікаўленымі рэспубліканскімі органамі дзяржаўнага кіравання пытання па наданні выключнага права дзяржаве на ажыццяўленне імпарту шэрагу прамысловых тавараў працу па падрыхтоўцы нарматыўнага дакумента лічыць немэтазгоднай, увядзенне спецімпарцёраў надалей не плануецца», — гаворыцца ў паведамленні, размешчаным на сайце Мінпрама.
Нагадаем, на мінулым тыдні стала вядома аб тым, што распрацаваны ўказ прэзідэнта, згодна з якім з 1 ліпеня 2014 года да 1 студзеня 2015-га дзяржаве будзе перададзена выключнае права на ажыццяўленне імпарту шэрагу тавараў: радыё-, тэле-, відэа- і бытавой тэхнікі, падшыпнікаў, рухавікоў, сельгастэхнікі, грузавых аўтамабіляў, станкоў, уборачнай тэхнікі, ліфтаў, шын і іншых.
Такую меру ва ўрадзе растлумачылі неабходнасцю абароны інтарэсаў дзяржавы. Планы па ўвядзенні інстытута спецімпарцёраў выклікалі крытыку з боку прадстаўнікоў дзелавых колаў.