У штаб-кватэры Еўрапейскай федэрацыі гандбола ў Вене 27—28 чэрвеня адбылося лёсаванне кваліфікацыйнага турніру мужчынскай Лігі чэмпіёнаў.
Беларусь у гэтым турніры прадставіць Брэсцкі гандбольны клуб імя Мяшкова, які выйграў апошні чэмпіянат краіны.
У Брэсце разлічвалі, што клуб трапіць адразу ў групавы раўнд турніру, паколькі сыходзілі з 12-га месцы краіны ў еўракубкавым рэйтынг-лісце гадавой даўнасці. Але па новых правілах, пры лёсаванні Лігі чэмпіёнаў ЕГФ зыходзіла з падліку вынікаў выключна ў гэтым турніры за тры сезоны, уключаючы нядаўна завершаны. Там Беларусь была чатырнаццатай.
У выніку БГК прыйдзецца прайсці кваліфікацыю, матчы прызначаны на 6—7 верасня. Сапернікам брэстаўчан на гэтым этапе турніру сталі галандскі «Таргас Бевас Панінген», славацкі «Татран» і сербская «Вайводзіна». Кваліфікацыя пройдзе ў Брэсце ў фармаце «фінал чатырох». У першы дзень у паўфінале «мяшкоўцы» згуляюць з клубам з Панінгена, у выпадку поспеху ў фінале сустрэнуцца з пераможцам пары «Татран» і «Вайводзіна». Заўважым, што два апошнія клубы з`яўляюцца сапернікамі БГК і па інтэрнацыянальнай SEHA-лізе.
У выпадку паспяховага праходжання кваліфікацыі ў групавым раўндзе турніру сапернікамі БГК могуць стаць нямецкі «Кіль», македонскі «Металург», харвацкі «Заграб», іспанскі «Лагран`ё» і французскі ПСЖ.
Усё вышэй пералічаныя клубы плюс пераможца кваліфікацыйнага турніру ў Брэсце і склалі групу «А» асноўнага раўнда Лігі чэмпіёнаў. Гэты этап турніру пройдзе з кастрычніка 2014 года па люты 2015 года.
