Прэм'ер-міністр Аўстраліі Тоні Эбат заявіў, што на месцы падзення малазійскага Боінга-777 ў Данецкай вобласці ў вялікіх маштабах падтасоўваюць доказы.
«Мы назіраем фальсіфікацыю доказаў у прамысловых маштабах, і гэтаму трэба пакласці канец», — цытуе прэм'ера аўстралійскі тэлеканал «Эй-Бі-Сі» (ABC).
Аўстралійскі прэм'ер падкрэсліў, што на месцы крушэння павінна быць забяспечана бяспека, і вітаў аднагалоснае прыняцце ў Савеце бяспекі ААН рэзалюцыі адносна авіякатастрофы. Нагадаем, рэзалюцыя заклікае прадаставіць спецыялістам бесперашкодны доступ да месца крушэння самалёта.
Аўстралійскі прэм'ер таксама абвясціў аб запуску аперацыі па вяртанні на радзіму целаў загінулых у катастрофе аўстралійцаў і іх ідэнтыфікацыі. Паводле яго слоў, аперацыю будзе каардынаваць ва Украіне былы міністр абароны Ангус Х'юстан.
У аўторак у Нідэрланды прыбудзе аўстралійскі ваенны транспартны самалёт для транспарціроўкі целаў ахвяр у Аўстралію.