У аднаўленне гістарычнага помніка інвестуе грошы кампанія «ТракЦэнтр Азярцо».
«Наша Ніва» летась пісала пра рэстаўрацыю бровара ў в. Стайкі на Вілейшчыне. Тады яшчэ вяліся толькі кансервацыя і супраць аварыйныя работы. «НН» наведала помнік, каб паглядзець на ўжо зробленае.
Згодна з пашпартам аб’екта, тут праводзіцца рэканструкцыя з рэстаўрацыяй будынка бровара пад канцэртна-выставачную залу. Працы павінны быць скончаны ўжо ў жніўні. Праўда, да адкрыцця комплекса яшчэ далёка.
Будынак колішняга бровара займеў новы дах, падлогу, прыбудову. Наперадзе — унутранае аздабленне. Тут павінны паўстаць канферэнц-зала, рэстаран. Паблізу плануецца пабудаваць невялікі гатэль. Ідэя ў тым, каб у Стайках можна было прымаць дэлегацыі, праводзіць перамовы, канцэрты, выставы. Каб людзям было дзе спыніцца на некалькі дзён, пад’есці. І ўсё гэта на прыродзе — падалей ад гарадскога тлуму.
Адрэстаўраваны бровар займее і каналізацыю. Раней яна таксама была. На фота — засыпаны калодзеж, праз які выходзілі адкіды.
Двор Стайкі належаў панам Багдановічам. Сядзіба з’явілася ў першай палове XVIII ст. У канцы стагоддзя паўстаў новы дом. У ім, як сцвярджае гісторыя, спыняўся ў 1812 годзе Напалеон. У пачатку мінулага стагоддзя Двор Стайкі ўяўляў сабой сядзібу, парк, водную сістэму, уязную браму, бровар, стайню, іншыя гаспадарчыя пабудовы. Да сёння захаваліся часткова бровар і стайня, парк, сажалка.
Мяркуецца, што комплекс запрацуе напоўніцу толькі ў наступным годзе.
Цяпер чытаюць
Хрыста Грозеў: Мельнікава як мінімум год, а хутчэй за ўсё, паўтара перадавала інфармацыю беларускім спецслужбам25
Каментары