Міністр замежных спраў Літвы Лінас Лінкявічус падчас візіту ў Мінск 24-25 ліпеня сустрэнецца са сваім беларускім калегам Уладзімірам Макеем, прэм'ер-міністрам Беларусі Міхаілам Мясніковічам і прадстаўнікамі грамадзянскай супольнасці.
«Адбудуцца перамовы кіраўнікоў замежнапалітычных ведамстваў Беларусі і Літвы. Літоўскі міністр замежных спраў таксама будзе прыняты ва ўрадзе Беларусі», — сказаў на брыфінгу 24 ліпеня ў Менску прэс-сакратар МЗС Беларусі Дзмітрый Мірончык.
Лінкявічус сустрэнецца, у прыватнасці, з Міхаілам Мясніковічам, паведамляе МЗС Літвы.
Па словах Мірончыка,
на парадку дня перамовы «па шырокім спектры пытанняў беларуска-літоўскага супрацоўніцтва, а таксама ўзаемадзеянне Беларусі і Еўрапейскага саюза».
Прэс-сакратар МЗС удакладніў, што візіт Лінаса Лінкявічуса з'яўляецца візітам у адказ — Уладзімір Макей наведваў Вільню 28 лютага—1 сакавіка гэтага года па запрашэнні літоўскага калегі.
Як раней паведамляў БелаПАН,
падчас візіту кіраўнік замежнапалітычнага ведамства Літвы таксама плануе сустрэцца з прадстаўнікамі беларускай апазіцыі, грамадзянскай супольнасці і сваякамі палітвязняў.
У 2012 годзе Лінкявічус на працягу чатырох месяцаў (з 24 ліпеня па 28 лістапада) працаваў амбасадарам Літвы ў Беларусі, а затым быў адкліканы з гэтай пасады ў сувязі з прызначэннем на пасаду міністра замежных спраў Літвы.
