Прэм'ер-міністр Украіны Арсеній Яцанюк падаў у адстаўку «ў сувязі з распадам кааліцыі і блакаваннем урадавых ініцыятыў».
Выступаючы з трыбуны Вярхоўнай Рады Украіны, Яцанюк заявіў, што ні ў якім разе не пагодзіцца на кааліцыю з «рэгіяналамі» і камуністамі, а паколькі дзеючая кааліцыя развалілася, то ён прыняў рашэнне падаць у адстаўку.
«Якія ёсць варыянты ва ўрада? Паколькі ў нас парламенцка-прэзідэнцкая рэспубліка, то першы варыянт: распалася адна кааліцыя, прэм'ер-міністр пачынае працэдуру фарміравання новай кааліцыі. Што гэта азначае? Гэта азначае, што прэм'ер-міністр павінен ўзяць у кааліцыю камуністаў і «рэгіёны». Я гэтага не зраблю ні пры якіх абставінах », — падкрэсліў Яцанюк.
Паводле яго слоў, «ёсць другі варыянт. У гэтым выпадку, калі няма новай кааліцыі, а дзеючая кааліцыя ў парламенцка-прэзідэнцкай рэспубліцы распалася, урад і прэм'ер-міністр абавязаны падаць у адстаўку. Я заяўляю аб адстаўцы ў сувязі з распадам кааліцыі і блакаваннем урадавых ініцыятыў», — сказаў Яцанюк.
Сёння, 24 ліпеня, старшыня Вярхоўнай Рады Украіны Аляксандр Турчынаў абвясціў аб спыненні дзейнасці кааліцыі «Еўрапейскі выбар» у ВР. Турчынаў адзначыў, што сёння на пленарным пасяджэнні фракцыі «УДАР» і «Свабода» заявілі аб выхадзе са складу кааліцыі і падалі адпаведныя дакументы з асабістымі подпісамі, якія пацвярджаюць рашэнне народных дэпутатаў. Акрамя таго, па яго словах, яшчэ 19 народных дэпутатаў заявілі і падалі заявы аб выхадзе са складу кааліцыі.
Нагадаем, фракцыі «УДАР» і «Свабода» абвясцілі аб выхадзе з кааліцыі, каб даць падставы прэзідэнту Украіны распусціць цяперашні парламент і прызначыць новыя выбары. Як вядома, згодна з Канстытуцыяй Украіны, у выпадку, калі на працягу 30 дзён не будзе створана новая кааліцыя, гэта дае падставы прэзідэнту Украіны распусціць ВР Украіны.
