Сінод Рускай праваслаўнай царквы зацвердзіў рашэнне аб стварэнні Сінадальнай рэвізійнай камісіі Беларускай праваслаўнай царквы.
Пра гэта гаворыцца ў часопісах нядаўняга пасяджэння Сінода РПЦ, якія апублікаваныя на афіцыйным сайце Маскоўскага патрыярхата.
Рашэнне на ўзроўні Беларускага Экзархата было прынята яшчэ ў чэрвені, цяпер яно канчаткова зацверджана РПЦ.
Адпаведная камісія павінна будзе забяспечваць захаванасць рухомай і нерухомай маёмасці БПЦ як у грашовай, так і ў натуральнай форме, а таксама кантраляваць яе рацыянальнае, беражлівае і эфектыўнае выкарыстанне.
Плануецца, што старшынёй гэтай структуры стане настаяцель прыхода храма Нараджэння Хрыстовага горада Барысава, благачынны Барысаўскай раённай акругі Мінскай епархіі протаіерэй Аляксандр Вярбіла. У яе склад таксама ўвойдуць чатыры клірыкі з Мінска і дзве свецкія асобы.