У Слаўгарадскім раёне 28 ліпеня ў месцы ўпадзення ракі Проня ў раку Сож пры купанні патануў 17-гадовы юнак. Дзяўчына, якая купалася разам з ім, шпіталізаваная.
Як паведамілі БелаПАН у Магілёўскім абласным упраўленні МНС, каля 12.00 28 ліпеня 17-гадовы хлопец са Слаўгарада і яго равесніца з Краснаполля купаліся ў рацэ Проня. Пераходзячы месца ўпадзення Проні ў Сож, купальшчыкі трапілі ў яму і пачалі тануць, паколькі абодва не ўмелі плаваць.
«Хлопец патануў адразу, а дзяўчына трымалася на паверхні вады і клікала на дапамогу. Ратавальнік Асвода, які дзяжурыў на беразе, кінуў ёй ратавальны круг і паспяшаўся на дапамогу. Ён змог выцягнуць дзяўчыну з вады. Брыгадай хуткай медыцынскай дапамогі яна была шпіталізаваная ў Слаўгарадскую райбальніцу», — паведамілі ва ўпраўленні.
Праз нейкі час цела патанулага хлопца дасталі з вады вадалазы маняўрова-ратавальнай групы Асвода Магілёва.
