Аляксандр Лукашэнка даручыў Камітэту дзяржаўнага кантролю кантраляваць фарміраванне тарыфаў на электраэнергію. Такую задачу ён паставіў сёння ў час наведвання Бярозаўскай ДРЭС.
Кіраўніку дзяржавы было даложана аб выкананні яго даручэнняў па развіцці Беларускай энергетычнай сістэмы. Паводле слоў міністра энергетыкі Уладзіміра Патупчыка, у выніку мадэрнізацыі Беларускай энергетычнай сістэмы эканомія газу склала 2,058 млрд куб.м, што эквівалентна эканоміі $650 млн. Паводле яго слоў, прынятыя меры даюць магчымасць з 2015 года штогод эканоміць 1,130 млрд куб.м газу, што эквівалентна $260 млн.
Уладзімір Патупчык адзначыў, што пры цане на газ у 1,7 раза вышэйшай, чым у Расіі, у Беларусі ёсць аднолькавы сабекошт па выпрацоўцы электрычнай і цеплавой энергіі. У той жа час пры аднолькавым сабекошце тарыфы для рэальнага сектара эканомікі ў Беларусі вышэйшыя. Паводле слоў міністра, такая сітуацыя складваецца з-за перакрыжаванага субсідзіравання, у рамках якога тарыфы для насельніцтва ў 5 разоў ніжэйшыя, чым у Расіі. Уладзімір Патупчык звярнуў увагу на той факт, што ў 2014 годзе ў краіне ўпершыню за ўсю гісторыю пайшлі на зніжэнне тарыфаў для рэальнага сектара эканомікі. У бягучым годзе аб'ём перакрыжаванага субсідзіравання зменшыўся на $250 млн.
«Трэба ўважліва паглядзець, — сказаў Лукашэнка, звяртаючыся да першага намесніка старшыні Камітэта дзяржкантролю Леаніда Анфімава, - у нас прывыклі: вось мы народ забяспечваем, таму ў нас дрэнна, рэальны сектар куляецца».
«Трэба сур'ёзна паглядзець і па іншых пытаннях», — дадаў ён.
