Святочныя лінейкі, прысвечаныя пачатку новага навучальнага года, пройдуць у мінскіх школах 30 жніўня.
фота Сяргея Гудзіліна
Пра гэта паведаміў старшыня камітэта па адукацыі Мінгарвыканкама Міхаіл Мірончык сёння на аператыўнай нарадзе ў гарвыканкаме.
З 1 верасня да заняткаў ва ўстановах агульнай сярэдняй адукацыі ў новым навучальным годзе пачнуць 165 тыс. навучэнцаў, што на 1,7 тыс. больш чым у мінулым годзе.
У сталічных школах адкрыецца 807 першых класаў, колькасць якіх у параўнанні з мінулым годам павялічыцца на 22.
За парты сядуць больш за 19 тыс. першакласнікаў, што на 3 тыс. больш, чым у 2013-м.
«Паводле традыцыі 1 верасня першы ўрок у сталічных школах будзе называцца «Я - мінчанін». На гэтых уроках будуць прысутнічаць ветэраны ВАВ, прадстаўнікі Мінгарвыканкама, міністэрстваў і ведамстваў», - адзначыў Міхаіл Мірончык.
Гаворачы пра ўкамплектаванасць кадрамі, Міхаіл Мірончык адзначыў, што цяпер у Мінску бракуе настаўнікаў пачатковых класаў і выхавальнікаў дашкольных устаноў.
«Пры гэтым нельга сказаць, што ёсць сур'ёзная кадравая праблема. Установы адукацыі пастаянна папаўняюцца новымі кадрамі, толькі ў новым навучальным годзе ў сістэму адукацыі Мінска прыйдуць каля 700 маладых спецыялістаў», - растлумачыў ён.
