Беларусь зацікаўлена ў пашырэнні супрацоўніцтва з Малайзіяй, заявіў міністр замежных спраў Уладзімір Макей у ходзе сустрэчы 19 жніўня ў Мінску з намеснікам спікера Палаты прадстаўнікоў парламента Малайзіі Рональдам Кіандзі.
Кіраўнік МЗС адзначыў, што ў ходзе візіту ў Беларусь малайзійскай дэлегацыі будуць абмяркоўвацца новыя перспектыўныя кірункі супрацоўніцтва бакоў. Ён выказаў упэўненасць, што візіт Кіандзі, які з'яўляецца кіраўніком беларуска-малайзійскай парламенцкай групы дружбы, будзе садзейнічаць нарошчванню супрацоўніцтва паміж краінамі ў розных сферах.
«Мы спадзяёмся, што кантакты паміж парламентамі Беларусі і Малайзіі будуць садзейнічаць развіццю двухбаковых кантактаў», — сказаў Макей.
Візіт парламенцкай дэлегацыі Малайзіі праходзіць з 18 па 22 жніўня.
Запланаваны таксама сустрэчы малайзійскай дэлегацыі з кіраўніцтвам розных міністэрстваў і ведамстваў. Дэлегацыя наведае ААТ «Беларуськалій», ААТ «Мінскі завод колавых цягачоў», ААТ «Мінскі трактарны завод», Беларускі дзяржаўны медыцынскі ўніверсітэт, малочнатаварны комплекс ААТ «Гастэлаўскае», Беларускі дзяржаўны музей гісторыі Вялікай Айчыннай вайны і Нацыянальную бібліятэку Беларусі.