Маладзечанскі начны клуб «Клаб» праводзіць даволі незвычайную і супярэчлівую PR-акцыю.
Нядаўна ў суполцы клуба «Укантакце» з'явілася паведамленне (пунктуацыя арыгінала захаваная): «Гэта не жарт. Прыйшлі на …@… ананімна фота ці відэа як ты смажыш яе ў WC за лепшае фота ці відэа Klab дорыць табе бясплатны ўваход цягам года».
Фота з «Укантакце».
Фота з «Укантакце».
Пасля з'яўлення інфармацыі аб акцыі «Клаба» ў СМІ з суполкі клуба прыбралі абвестку, а ў стужцы з'явілася відэа, у якім дырэктар клуба прызнае памылку свайго калектыва і нібыта звальняецца.
«НН» звязалася з Наталляй Філістовіч, адказнай за сувязі з грамадскасцю клуба.
Наталля патлумачыла, што паведамленне аб акцыі сапраўды было, аднак супрацоўнікі клуба разлічвалі на скандальны піяр праз саму абвестку, а не на тое, што хтосьці сапраўды дашле нейкія фатаздымкі ці відэаролікі.
Філістовіч кажа, што праваахоўныя органы клубам з нагоды акцыі не цікавіліся: «Так, за такое можа быць і крымінальная адказнасць, аднак усё можна абыграць. У паведамленні не ўказана, што гэта мусяць быць хлопец ці дзяўчына».
Надзвычай пошлая інтэрпрытацыя акцыі абурыла і некаторых інтэрнаўтаў. Зрэшты, некаторыя папракалі каментатараў, што ім на розум адразу прыходзіць толькі сэкс, а ў супрацьвагу выкладвалі фатаздымкі бульбы на патэльні над унітазам ці мангала ў ванне.
Ды і даслаць фатаздымкі на адрас, указаны ў паведамленні аб акцыі, немагчыма: скрыня …@… не існуе.
Звальненне дырэктара таксама выявілася несапраўдным. Філістовіч патлумачыла, што відэа са звальненнем — частка піяр-кампаніі, і прапанавала сачыць за навінамі ў суполцы клуба.
