Мішэль Плаціні і Зэп Блатэр
Кіраўнік Міжнароднай федэрацыі футбола Зэп Блатэр пацвердзіў свой удзел у выбарах прэзідэнта ФІФА, запланаваных на май 2015 года.
Блатэр кіруе арганізацыяй цягам 16 гадоў, з 1998-га, і чарговы тэрмін на пасадзе прэзідэнта можа стаць для яго ўжо пятым.
Галоўны апанент Зэпа Блатэра — прэзідэнт УЕФА Мішэль Плаціні — раней заявіў, што вырашыў не ўдзельнічаць у выбарах і асяродзіцца на працы ў Саюзе еўрапейскіх футбольных асацыяцый.
У чэрвені француз заяўляў, што больш не будзе падтрымліваць кандыдатуру Блатэра на выбарах, бо ФІФА патрабуе «глытка свежага паветра».
78-гадовы Зэп Блатэр абвясціў пра ўдзел у чарговых выбарах у відэаінтэрв'ю, якое было прадэманстравана на канферэнцыі «Сокарэкс» у Манчэстэры.
Пакуль адзіны кандыдат, які падаў афіцыйную заяўку на выбары, — экс-намеснік генеральнага сакратара ФІФА Жэром Шампань.
На думку экспертаў, адсутнасць Мішэля Плаціні сярод кандыдатаў на пасаду прэзідэнта фактычна гарантуе пераабранне Зэпа Блатэра.
Дарэчы Блатэр сёння пракаментаваў сітуацыю з магчымым байкотам ЧС-2018 у Расіі, да якога заклікаюць заходнія чыноўнікі.
«Так, я чуў пра тое, што гучаць галасы пра байкот ЧС-2018 у Расіі, але байкот у спорце ніколі не прыносіў нікому ніякай карысці. Давайце пачакаем развіцця геапалітычнай сітуацыі.
Мы па-ранейшаму працуем з Расіяй, тры тыдні таму я быў у Расіі, рэгулярна атрымліваю справаздачы, што там адбываецца», — сказаў кіраўнік ФІФА.