Украінскі парламент на закрытым пасяджэнні падтрымаў прэзідэнцкія законы пра асаблівы статус Луганскай і Данецкай абласцей і пра амністыю для ўдзельнікаў падзей на Данбасе.
Датэрміновыя мясцовыя выбары на тэрыторыях, якія падкантрольныя самаабвешчаным «ДНР» і «ЛНР», павінны адбыцца 7 снежня (выбары ва Украіне пройдуць 26 кастрычніка).
Тэрыторыі з асаблівым статусам на тэрыторыі Луганскай і Данецкай абласцей, паводле закона, павінна вызначаць сваім рашэннем Вярхоўная Рада Украіны.
Таксама парламент зацвярджае фінансаванне, якое будзе накіроўвацца на аднаўленне і ўтрыманне асаблівых тэрыторый.
Народная міліцыя, якая будзе стварацца мэрамі абраных на выбарах гарадоў, складацца выключна з грамадзян Украіны, якія зарэгістраваныя ў адпаведных населеных пунктах.
Тэрмін дзеяння асаблівага статусу гэтых тэрыторый складае тры гады.
Прыняты таксама закон «Аб недапушчэнні пераследу і пакарання удзельнікаў падзей на тэрыторыі Данецкай і Луганскай абласцей».
Амністыя для актывістаў самаабвешчаных «ДНР» і «ЛНР» не будзе распаўсюджвацца на асоб, якія ўчынілі цяжкія злачынствы ці датычныя да падзення малайзійскага самалёта рэйса MH17.
Таксама амністыя не закране людзей, якія маюць дачыненне і абвінавачваюцца ў забойствах, замаху на жыццё дзяржаўнага дзеяча, дыверсіях, захопе закладнікаў, гандлі людзьмі, згвалтаванні і фінансаванні тэрарызму.
Пасля прыняцця законаў у закрытым рэжыме Вярхоўная Рада перайшла да адкрытага разгляду пытання аб ратыфікацыі Пагаднення аб асацыяцыі з Еўрасаюзам.