У Беларусі ўстаноўлены месячны тэрмін на засяленне грамадзян у пабудаваныя шматкватэрныя дамы. Такая норма вызначана распараджэннем прэм'ер-міністра № 270р ад 20 верасня 2014 года.
Як паведамляе прэс-служба ўрада, засяліцца ў месячны тэрмін з дня прыёмкі шматкватэрнага жылога дома ў эксплуатацыю змогуць грамадзяне, якія ў поўным аб'ёме разлічыліся за выкананыя работы. Пры гэтым «невыкананне асобнымі грамадзянамі ўказаных разлікаў не можа з'яўляцца падставай для адмовы ў засяленні іншым грамадзянам, якія цалкам разлічыліся за выкананыя работы па будаўніцтве пэўных жылых памяшканняў у шматкватэрным жылым доме», сказана ў распараджэнні.
Замоўцы (забудоўшчыкі) шматкватэрных жылых дамоў павінны ў тэрмін, які не перавышае адзін месяц да запланаванай даты прыёмкі іх у эксплуатацыю, скласці дагаворы з тэрытарыяльнымі арганізацыямі па дзяржаўнай рэгістрацыі нерухомай маёмасці, правоў на яе і здзелак з ёй аб правядзенні тэхнічнай інвентарызацыі шматкватэрных жылых дамоў.
У месячны тэрмін з дня прыёмкі дома ў эксплуатацыю павінен быць праведзены комплекс мерапрыемстваў, неабходны для засялення грамадзян у пабудаваныя жылыя памяшканні і выдачы дакументаў для дзяржаўнай рэгістрацыі права ўласнасці на іх.
Забяспечыць выкананне пералічаных даручэнняў павінны аблвыканкамы і Мінгарвыканкам сумесна з Мінжылкамгасам, Мінэнергетыкі, Мінсувязі, Мінбудархітэктуры, Дзяржаўным камітэтам па маёмасці.
Мінжылкамгасу і Дзяржкаммаёмасці даручана каардынаваць працу і праводзіць аналіз выканання распараджэння прэм'ер-міністра. У Савет міністраў будзе штомесяц падавацца інфармацыя пра ход засялення запланаваных да эксплуатацыі ў 2014 годзе шматкватэрных жылых дамоў.
Зацікаўленым ведамствам даручана да 1 кастрычніка гэтага года ўнесці прапановы аб карэкціроўцы заканадаўства, уключаючы ведамасныя нарматыўныя прававыя акты, з улікам даручэнняў, якія змяшчаюцца ў распараджэнні прэм'ер-міністра № 270р ад 20 верасня 2014 года.
Персанальная адказнасць за выкананне гэтага распараджэння ўскладзена на старшыняў аблвыканкамаў і Мінгарвыканкама.
