Харчовая і сельскагаспадарчая арганізацыя Аб'яднаных Нацый (ФАО) выдзеліць Беларусі $3,1 млн у найбліжэйшыя тры гады на розныя праекты тэхнічнай дапамогі.
Аб гэтым было паведамлена 23 верасня ў Мінску, дзе адбылося падпісанне Краінавай Праграмы супрацоўніцтва Беларусі і ФАО на 2014—2016 гады.
Яна ўключае ў сябе рэалізацыю на тэрыторыі Беларусі праектаў тэхнічнай дапамогі па кіраванні састарэлымі пестыцыдамі; па апрацоўцы рапсу на землях, забруджаных радыенуклідамі ў выніку чарнобыльскай аварыі; па рацыянальным кіраванні і абароне лясоў ад пажараў; па харчовай бяспецы; па развіцці і ўмацаванні нацыянальнага патэнцыялу па ацэнцы, прадухіленні і барацьбе з афрыканскай чумой (АЧС) свіней і іншае.
«Мы ўпершыню падпісваем з Беларуссю Краінавую Праграму супрацоўніцтва і разлічваем, што гэта пакладзе пачатак нашаму далейшаму рэгулярнаму супрацоўніцтву», — заявіў намеснік генеральнага дырэктара, рэгіянальны прадстаўнік па Еўропе і Цэнтральнай Азіі ФАО Уладзімір Рахманін.
У сваю чаргу намеснік міністра сельскай гаспадаркі і харчавання Васіль Седзін адзначыў, што Беларусь хацела б мець больш цесныя кантакты з ФАО. Беларускі бок просіць аказаць садзейнічанне ў стварэнні лабараторыі па праверцы якасці і бяспецы айчыннага і імпартнага харчавання, а таксама разлічвае на больш істотную дапамогу па барацьбе з АЧС.
«Гэта праблема (АЧС) датычыцца не толькі нас, а ў цэлым усёй Еўропы і, можа быць, нават свету. Задача ФАО — зрабіць усё, каб яе наогул знішчыць», — сказаў Седзін.
Беларусь уступіла ў ФАО ў лістападзе 2005 года. У склад ФАО ўваходзяць 197 дзяржаў.
У Беларусі ідзе праца па праекце тэхнічнай дапамогі «Садзейнічанне па кантролі ўспышак АЧС у Беларусі» з бюджэтам у $420 тыс. Акрамя таго, у стадыі рэалізацыі знаходзіцца праект па кіраванні састарэлымі пестыцыдамі з бюджэтам прыкладна 560 тыс. еўра.
