Старшыня КДБ Беларусі Валерый Вакульчык спадзяецца, што ў літоўскага боку хопіць здаровага сэнсу пры прыняцці рашэння па лёсе затрыманага ў Літве кіраўніка УСК па Мінску Дзмітрыя Канаплянік.
Пра гэта ён заявіў сёння журналістам у палаце прадстаўнікоў.
«Праводзіцца разбіральніцтва. Я думаю, што хопіць здаровага сэнсу ў літоўскіх уладаў, каб аб'ектыўна разгледзець гэтае пытанне і ў самыя кароткія тэрміны прыняць нармальнае законнае рашэнне. Яны дэкларуюць сябе як прававая дзяржава, і сапраўды разумеюць, што павінны быць добрасуседскія адносіны паміж Літвой і Беларуссю, з іншымі краінамі», — сказаў Валерый Вакульчык.
Кіраўнік КДБ дадаў, што такія дзеянні Літвы відавочна не спрыяюць таму, каб развіваць адносіны паміж народамі і краінамі ў нармальным ключы, паведамляе БелТА.
Нагадаем, што раней паведамлялася, што на літоўска-беларускай мяжы 21 верасня быў затрыманы кіраўнік УСК па Мінску Дзмітрый Канаплянік.
Кіраўнік УСК па Мінску Дзмітрый Канаплянік, фота tut.by
Гэты факт быў абнародаваны СМІ, а затым Генеральная пракуратура Літвы пацвердзіла факт затрымання на літоўска-беларускай мяжы высокапастаўленага супрацоўніка беларускіх праваахоўных органаў і яго жонкі. У паведамленні Генпракуратуры імёны затрыманых не называліся, яны былі абазначаныя ініцыяламі Д.К. (чыноўнік) і А.К. (яго жонка).
У паведамленні Генпракуратуры казалася, што ў іх аўтамабілі Honda CR-V былі знойдзены некалькі дзясяткаў патронаў калібру 9 мм Luger. «Аб затрыманні двух грамадзян ва ўстаноўленым парадку было інфармавана пасольства Беларусі ў Вільні і неадкладна задаволена просьба пасольства аб сустрэчы з затрыманым Д.К.», — зазначае Генпракуратура. Пасля заканчэння 48 гадзін і ўстанаўлення асобаў затрыманыя былі адпушчаны з-пад варты, але з забаронай пакідаць Літву. Асабістыя дакументы ў іх былі канфіскаваныя.
Беларусы падазраюцца ў кантрабандзе боепрыпасаў для агнястрэльнай зброі. Дасудовае расследаванне праводзіць крымінальная мытная служба, кантралюе гэты працэс пракуратура Вільні. Па літоўскім заканадаўстве за такое злачынства прадугледжана пакаранне ад 3 да 10 гадоў пазбаўлення волі.