Праваабаронца Стэфановіч: Калі Рубцова асудзяць, мы прызнаем яго палітвязнем
Праваабаронца Валянцін Стэфановіч пільна сочыць за працэсам па справе Юрыя Рубцова. Стэфановіч патлумачыў, што «Нашай Ніве», што суд над Рубцовым расцэньваецца выключна як палітычна матываваны:
«Гэты працэс наўпрост звязаны з праблемай адвольных затрыманняў, шырока і даўно распаўсюджанай у Беларусі. Адвольных затрыманняў актывістаў апазіцыйных рухаў і партый з нагоды іх прыналежнасці да гэтых арганізацый.
Не так даўно на пасяджэнні сесіі АБСЕ у Варшаве мы прэзентавалі сумесны з Міжнароднай федэрацыяй за правы чалавека даклад на гэтую тэму. І Юрый Рубцоў там фігуруе некалькі разоў, ён быў двойчы затрыманы нібыта за тое, што лаяўся матам.
Працэс быў закрыты, туды нікога не пусцілі [адміністратыўны працэс над Рубцовым 28 красавіка — К.Х.], а цяпер міліцыянты, якія сведчылі, што Рубцоў мацюкаўся, сведчаць, што нібыта ён абражаў суддзю. Хоць у мяне іх паказанні выклікаюць сур'ёзны недавер. Усе паказанні напісаныя фактычна слова ў слова, да коскі. Тое ж самае мы бачылі і на судах пасля 19 снежня. У судовай зале аўдыязапіс не вёўся. Вельмі цяжка ўстанавіць ці былі фразы, інкрымінуемыя Рубцову, ці сапраўды ім сказаныя.
Трэба і ўлічваць, што Рубцоў быў дастаўлены ў суд у выглядзе, які абражае чалавечую годнасць. А суддзю Палулеха чамусьці не цікавіла, чаму перад ім стаіць па пояс голы чалавек. Бо калі б ён пацікавіўся, яму б сказалі, што чалавека затрымалі толькі за майку з надпісам «Лукашэнка, сыходзь». І больш ні за што. То бок чалавек быў затрыманы падчас выканання законнага права на мірныя сходы і на выказванне свайго меркаванн.
Таму калі Рубцоў будзе прыгавораны да трох гадоў абмежавання волі з накіраваннем ва ўстановы адкрытага тыпу — так званай «хіміі», праваабаронцы будуць лічыць яго палітычным вязнем».
«Некаторым людзям варта зняць ружовыя акуляры». Лявончык — пра Мельнікаву, уцечку ў «Байхэлп», белыя паліто і грошы на 1300 палітвязняў10
Каментары