Пошукі таямнічай падводнай лодкі ідуць шосты дзень, фота thelocal.se
Швецыя зафіксавала актыўнасць яшчэ адной падводнай лодкі ў сваіх тэрытарыяльных водах. Пра гэта паведамляе мясцовае выданне SVD са спасылкай на прадстаўнікоў узброеных сіл Швецыі.
Шведскія вайскоўцы ўстанавілі кантакт з некалькімі падводнымі аб'ектамі ў тэрытарыяльных водах краіны.
«Я хачу паведаміць, што былі зафіксаваныя два аб'екты, аб якіх паведамілі цывільныя, і гэтыя назіранні дастаткова цікавыя, каб пачаць працу па вывучэнні сітуацыі», — паведаміў адмірал Андэрс Грэнштад.
Ён заявіў, што цяпер у верагодным месцы іх знаходжання сканцэнтраваныя значныя сілы флоту краіны. Падазроныя аб'екты ляжаць на дне, на адлегласці некалькіх сотняў метраў адзін ад аднаго, і не рухаюцца.
Галоўнакамандуючы ўзброенымі сіламі Швецыі Сверкер Горансан паабяцаў прымяніць ваенную сілу, калі будзе знойдзена новая падводная лодка.
«Я не зайздрошчу тым, хто цяпер знаходзіцца там, у нашых тэрытарыяльных водах. І я лічу цалкам мэтазгодным прымяніць ваенную сілу», - заявіў Горансан.
