З наступнага году падаходны падатак па неасноўным месцы працы будзе зьніжаны з 20 % да 15 %. Гэта прадугледжана законапраектам пра ўнясеньне паправак у некаторыя законы па пытаньнях падаткаабкладаньня, які быў прыняты сёньня дэпутатамі палаты прадстаўнікоў нацыянальнага сходу ў другім чытаньні.
Як адзначыла намесьніца старшыні Сталай камісіі па бюджэце, фінансах і падаткавай палітыцы ніжняй палаты беларускага парлямэнту Сьвятлана Гіль, папраўкі прадугледжваюць, што з наступнага году грамадзяне, якія працуюць па сумяшчальніцтве, змогуць скарыстацца стандартнымі падаткавымі вылічэньнямі па падаходным падатку і па неасноўным месцы працы. Цяпер такія вылічэньні можна рабіць толькі па месцы асноўнай працы.
У 2008 годзе плянуецца адмяніць:
- падатак з карыстальнікаў аўтамабільных дарог у памеры 1% ад звароту
- мясцовыя зборы за ажыцьцяўленьне гандлю й будаўніцтва на тэрыторыі адпаведных адміністрацыйных адзінак
- збор за разьмяшчэньне знадворнай рэклямы на замежнай мове
- адлічэньне ў дзяржаўны мэтавы бюджэтны фонд будаўнічай навукі
Фота photo.bymedia.net
