7 лістапада ў Мінску ў аварыі на вуліцы Ванеева кампанія на Dodge ўрэзалася ў ліхтар. 16-гадовая школьніца загінула на месцы, а яе сяброўка-першакурсніца сканала ў бальніцы.
18-гадовы кіроўца, як мяркуецца, не справіўся з кіраваннем на павароце і ўехаў у ліхтарню. Кіроўца (правы атрымаў толькі два месяцы назад) і яшчэ двое пасажыраў засталіся жывыя.
«Дарына ехала да бабулі займацца англійскай мовай (яна выкладае ў школе). Позна выйшла і, як мы мяркуем, папрасіла сяброўку падвезці, — расказала «НН» другая бабуля школьніцы Сафія. — Дарына жыла на Берута, а ехала ў Серабранку.
І я патэлефанавала ёй у 9.45. Вясёлая такая была, збіралася таксі браць. І той бабулі сказала пра таксі. А ў 11 гадзін сказала, што ўжо едзе. І тая бабуля пачала ёй тэлефанаваць, калі яна ўжо не з’явілася. Пачала абзвоньваць таксапаркі, а там сказалі, што з таго адраса таксі не выклікалі. А пасля ўжо сыну патэлефанавалі. Яны з малодшымі дзецьмі былі ў Польшчы на выхадных: у чацвер паехалі, а ў пятніцу ім ужо пазванілі. Дарына — старэйшая ў сям’і, аднаму хлопчыку 11 гадоў, другому хутка 4».
Дарына ў наступным годзе павінна была скончыць сталічную гімназію №1. Хацела ехаць вучыцца ў Польшчу. Цэлы жнівень там займалася польскай мовай.
«Мне ў каментарыях на сайце напісалі: змірыцеся, хадзіце на могілкі, але ён (кіроўца) будзе хадзіць па зямлі. Пасядзіць у турме, а пасля яго адпусцяць… А мая дзяўчынка нават ні з адным хлопцам не сустракалася. Нават саромелася, калі мы загаворвалі пра гэта: «Бабуля, ну ты што, мне цяпер вучыцца трэба — якія хлопчыкі». Канечне, магчыма ёй нехта падабаўся, але не сустракалася. Усё аддавала вучобе, — ледзь стрымлівае слёзы Сафія. — У яе два малодшыя брацікі. Вось дзеля іх яшчэ… А вось дзяўчынка ў мяне адна…
13 студзеня ёй споўнілася б 17 гадоў. Я цяпер ненавіджу лічбу 13. І ўвогуле не магу на маладых глядзець. Учора ішла, насустрач дзяўчынкі яе ўзросту, усміхаюцца — так сэрца забалела».
У «Доджы» ў той дзень ехалі дзве пары, а Дарыну ўзяліся толькі падвезці. А Ганна, якая памерла ўжо ў бальніцы, была лепшай сяброўкай Дарыны. Яна вучылася ў БНТУ, мела толькі 17 гадоў.
«Додж», як высветлілася, быў узяты на пракат сябрам кіроўцы. Уладальнік машыны пасля аварыі ў сацыяльных сетках прызнаўся, што здаў магутнае аўто за бутэльку дарагога алкаголю. Праўда, раніцай 10 лістапада малады чалавек ужо адмовіўся размаўляць з карэспандэнтам «НН».
«Без каментарыяў», — і кінуў слухаўку.
Следчы камітэт завёў крымінальную справу за парушэнне ПДР, што пацягнула дзве смерці. Па словах прадстаўніка УСК па Мінску Аляксандра Герасімава, кіроўца ў момант аварыі быў цвярозы. Мера стрымання не абіралася.
