«Ну і ну! Зняць валюту з рахунку ў Беларусбанку, нейкіх пару соцень даляраў (не зачыняючы валютнага рахунку!), сёння вялікая праблема, — піша наша чытачка Людміла Мірзаянава. —
Пабывала ў аддзяленні №524/418 Беларусбанка, дзе на просьбу зняць 300 даляраў, першапачаткова атрымала адмову. У адказ на маё абурэнне работніца аддзялення банка заявіла: «Вы ж ведаеце пра сітуацыю ў краіне… Каб зняць валюту, трэба зрабіць папярэдні заказ. Сёння заказы прымаем на 12 дзён наперад».
Я вырашыла не адступаць і не пакідаць аддзялення, пакуль не вырашыцца маё пытанне, бо гаворка ішла ўсяго толькі аб 300 далярах. І тут я пачула навіну. Аказваецца, валюту трэба здымаць у тым аддзяленні банка, дзе быў адкрыты валютны рахунак. У маім канкрэтным выпадку, гэта Нясвіжскае аддзяленне Беларусбанка.
Людміле Мірзаянавай удалося забраць свае грошы.
«Цяпер такія парадкі. Асабіста мне таксама прыйдзецца здымаць даляры не ў Мінску, а на перыферыі», — патлумачыла мне банкаўская служачая і на ўсялякі выпадак папярэдзіла, што ў Нясвіжскім аддзяленні банка таксама ніхто не гарантуе, што мне адразу ж выдадуць некалькі сотняў даляраў. Такое магчыма толькі пры наяўнасці валюты.
Урэшце пасля пярэчанняў мне выдалі мае 300 даляраў. Але выдалі іх са словамі: «З-за Вас мы пайшлі на парушэнні».
Якія парушэнні?! Таварышы банкіры — «майстры інавацый» — хто з вас прыдумаў гэтую «навіну»?! Хто аддаў падобнае распараджэнне ў аддзяленнях Беларусбанка перад Новым годам?!» — абураецца Людміла Мірзаянава.
