Сёння ў мінскім офісе Quote Roller працуюць 16 чалавек, яшчэ 14 працуюць у Сан-Францыска і Паўднёвай Караліне. Праграма дазваляе адсылаць і адсочваць камерцыйныя прапановы, мае 4 тысячы платных кліентаў і блізу 10 тысяч бясплатных. Яна скіраваная найперш на англамоўны свет. Стваральнік Quote Roller Мікіта Мікада з’ехаў у Крэмніевую даліну тры гады таму.
Мікіта Мікада, фота: Яўген Ярчак / dev.by
Поспех Quote Roller Мікада звязвае з нізкай цаной (праграма за 50 даляраў замяняе тры прадукты на 300 даляраў сумарна). Але прызнае:
прадаваць пачалі позна, бізнес-праграмы трэба прадаваць яшчэ за год да выпуску.
Да таго ж, пэўны час прываблялі толькі дробных кліентаў — спецыяліст па продажах з’явіўся толькі паўтара года таму і адразу павялічыў сярэднюю суму ўгодаў з 500 даляраў да 5-20 тысяч. А вось дырэктара, нанятага ў ЗША, вырашылі звольніць.
Таксама памылкай ён называе боязь прадаваць частку кампаніі (думалі: «Аддаць 8% — нешта многа, ну яго»), бо гэта дазволіла бы хутчэй выйсці на цяперашнюю выручку. Калі атрымалі грошы, то баяліся іх траціць, хаця было бы варта — на маркетынг, продажы, PR.
«Агрэсіўней трэба быць у інтэрнэт-бізнэсе, бо калі будзеш тармазіць, знойдзецца хтосьці агрэсіўней за цябе, хто збярэ больш, патраціць больш, зробіць лепшую каманду па продажах і маркетынгу»,
— на думку Мікады, гэта праўдзіва не заўсёды для спажывецкага рынку, але заўсёды для рынку бізнес-паслуг.
Яго кампанія не мае імгненнага прыбытку — пакупнікі плацяць за падпіску на паслугі. Грошы, што трацяцца на прывабливанне карыстальнікаў, не вяртаюцца імгненна. Але гэта не прычына звальняць спецыялістаў па продажах — Quote Roller яшчэ не ахапіў і дзясятай долі патэнцыйнага рынку.
Бліжэйшая мэта яго кампаніі — дасягнуць пэўных лічбаў па выручцы, нарасціць дэпартамент маркетынгу і продажаў, распрацаваць партугальскую і іспанскую версіі Quote Roller. Паралельна распачынаць іншы праект Мікада не плануе.
Седзячы ў Беларусі, Quote Roller зараблялі бы меней, сцвярджае Мікада.
Ехаць у Крэмніевую даліну ўсім не абавязкова — але там можна завесці знаёмых сярод кіраўнікоў дэпартаментаў продажаў кампаній кшталту Google, людзі там лёгка дзеляцца прафесійнымі сакрэтамі, якія у Беларусі ў сферы бізнес-паслуг мала хто ведае.
Жыццё навучыла яго асабіста праводзіць інтэрв’ю з кандыдатамі на працу. «Навучыцца працаваць з людзьмі, кіраваць і натхняць - самая складаная задача. Зрабіць прыгожы прадукт - гэта адно. Куды складаней стварыць кампанію, у якой працуе некалькі сотняў чалавек», — кажа ён.
Паводле яго слоў, пра Беларусь у Крэмніевай даліне не асабліва ведаюць.
Беларуская ІТ-сфера не выпрацавала свой брэнд — хутчэй ведаюць усходне-еўрапейскіх праграмістаў. Больш-менш вядомая Эстонія — дзякуючы Skype і рэпутацыі «стартап-хаба».
З Беларускіх праграмных прадуктаў выкарыстоўвае мэсэнджэр Viber і карты Maps.ME, яго каманда карыстаецца багтрэкерам TrackDuck. А вось у «Танкі» не гуляе — як і ў гульні наогул.
Кнігі, якія рэкамендаваў Мікіта Мікада:
- Пітэр Ціль, «Zero to One»
- Сэт Фрыман, «The Art of Negotiating the Best Deal»
- Джэймс Рыкардс, «Currency Wars»
- Ааран Рос, «Predictable Revenue»
- Дэйл Карнэгі, «Як заводзіць сяброў і ўплываць на людзей»